Hiren Hipp

De 15. Februar 2026 huet de Pol Greisch eis verlooss. Säi Numm steet stellvertriend fir d’Renaissance vum Theater op Lëtzebuergesch vun de 60er Joer un bis bal haut. Mat dësem Owend wëllt den TNL him eng kleng Reverenz erweisen.

Nom Pol sengem Doud huet säi Jong Cary an engem Tirang e komplett onbekannt Stéck fonnt. Hiren Hipp ass en Text vun 1993, also entstaan kuerz no sengem Wierk E Stéck Streisel, wat deemols e grousse Succès war. Hiren Hipp ass souzesoën en typesche Greisch: kloer gezeechent Figuren mat enger déiwer Mënschlechkeet, engem wonnerbaren Humor, enger präziser Sprooch a – mir näischt, dir näischt – enger sozialer Analys vun der Lëtzebuerger Gesellschaft, déi sengesgläiche sicht.